@uzbyuksalish

Telegram

@uzbyuksalish

A`ZO BO`LISH

“Yuksalish” harakati va BMTning O‘zbekistondagi vakolatxonasi o‘rtasida “yo‘l xarita”si ishlab chiqiladi

 2019-02-13 00:00:00   |     Просмотров: 3600

O‘zaro hamkorlik va qo‘shma loyihalarni amalga oshirish masalalarini muhokama 
qilish maqsadida “Yuksalish” umummilliy harakati raisi Akmal Burxanov 
BMTning O‘zbekistondagi doimiy koordinatori Xelena Freyzer bilan uchrashdi.

Tomonlar BMTning Barqaror rivojlanish maqsadlari hamda “Yuksalish” 
umummilliy harakatining faoliyat yo‘nalishlari bilan mosligi yaqin hamkorlik 
aloqalarini o‘rnatishga xizmat qilishini ta’kidlashdi. Xususan, Harakatning xech 
qanday siyosiy qarashlarga ega emasligi, unga ixtiyoriylik asosida a’zo bo‘lish 
imkoniyati hamda joylarda ham tashkilot vakillarining faoliyat yuritishi 
muhimligi uchrashuv davomida aytib o‘tildi.

Shuningdek, OAV vakillarini keng jalb qilgan holda joylarda jamoatchilik 
monitoringi tadbirlarini o‘tkazish, amalga oshirilayotgan islohotlarni chekka 
hududlarga ham o‘z vaqtida va eng asosiysi tushunarli tilda etib borishini 
ta’minlash, yoshlarning iste’dodlarini qo‘llab-quvvatlash hamda fuqarolik 
jamiyati institutlarini rivojlantirish bo‘yicha qo‘shma loyihalarni amalga 
oshirish muhokama qilindi.

Uchrashuv davomida “Yuksalish” umummilliy harakatining maqsad va 
vazifalaridan kelib chiqqan holda, fuqarolarni qiynayotgan qator masalalarni 
o‘rganish bo‘yicha ham ishlar olib borilishi mumkinligi aytildi. Jumladan, oziq-
ovqat xavfsizligini ta’minlash, xorijdagi mehnat migrantlari, yo‘l harakati 
xavfsizligi va yo‘llarda avtotransportda harakatlanish madaniyatini oshirish 
kabi yo‘nalishlarda ham dolzarb loyihalarni hayotga tadbiq etish ikki 
tashkilotning ham qiziqishida ekanligi alohida ta’kidlandi.

Muzokaralar natijasida tomonlar “Yuksalish” umummilliy harakati va BMTning 
O‘zbekistondagi vakolatxonasi o‘rtasida qo‘shma loyihalarni amalga oshirish 
bo‘yicha “yo‘l xarita”sini ishlab chiqishga kelishib oldilar.