@uzbyuksalish

Telegram

@uzbyuksalish

Ёшлар интилиш ва ташаббус етакчилари!

 2026-03-26 19:54:27   |     Просмотров: 1251

Бугунги глобаллашув шароитида, албатта, ёшларнинг таълими, бандлиги ва иқтисодий фаоллиги мамлакат тараққиётининг энг муҳим омилларидан бири ҳисобланади. Сўнгги йилларда, айниқса, юртимизда ёшлар масаласи давлат сиёсатининг устувор йўналишига айлантирилди. Натижада, амалга оширилган ислоҳотлар нафақат институционал ўзгаришлар, балки ёшларнинг ҳаёт сифатини яхшилашга қаратилган кенг кўламли амалий чораларни ҳам қамраб олди.

Хусусан, 24-феврал куни Президентимиз Шавкат Мирзиёев ёшлар билан ўтказган очиқ мулоқот ушбу жараённинг янги босқичини бошлаб берди. Мазкур мулоқотда илгари сурилган ташаббуслар, бир томондан, ёшларнинг иқтисодий мустақиллигини ошириш, иккинчи томондан эса таълим имкониятларини кенгайтириш, стартап ва инновацион лойиҳаларни қўллаб-қувватлаш, шунингдек, ижтимоий фаолликни рағбатлантириш каби устувор йўналишларни ўз ичига олди.

Шубҳасиз, бу ташаббуслар нафақат ёшларнинг бугунги эҳтиёжларига жавоб беради, балки уларнинг келажакдаги мақсадларини рўёбга чиқариш учун мустаҳкам пойдевор яратади. Энг муҳими, мазкур ёндашув ёшларни сиёсатнинг оддий обекти сифатида эмас, балки ислоҳотларнинг фаол иштирокчиси сифатида кўришга асосланади. Натижада, мамлакатимизда интеллектуал салоҳияти юқори, ташаббускор ва замонавий фикрлайдиган янги авлод шаклланиб бормоқда.

Алоҳида таъкидлаш жоизки, ёшлар тадбиркорлигини қўллаб-қувватлаш бўйича белгиланган чора-тадбирлар ўзининг миқёси ва мазмуни жиҳатидан катта истиқболга эга. Жумладан, 200 миллион доллар қўшимча маблагъ йўналтирилиши, ўзини ўзи банд қилган ёшлар учун кредитлар ҳажмининг кенгайтирилиши, шунингдек, 100 минг долларгача инвестиция ажратиш имкониятининг яратилиши янги иқтисодий авлод шаклланишига хизмат қилмоқда. Натижада минглаб ёшлар ўз бизнес ғояларини амалиётга татбиқ этиш, фаолиятини кенгайтириш ва стартапларини мустаҳкамлаш имкониятига эга бўлмоқда.

Шу билан бирга, мулоқот давомида илгари сурилган ташаббусларнинг муҳим қисми инновацион фикрлашга эга ёшларни қўллаб-қувватлашга қаратилгани билан аҳамиятлидир. Дарҳақиқат, сўнгги йилларда мамлакатимизда стартап экотизими шаклланмоқда, бироқ уни янада ривожлантириш учун қўшимча туртки зарур эди. Айнан Шавкат Мирзиёев томонидан илгари сурилган янги ташаббуслар ушбу эҳтиёжга муносиб жавоб бўлди.

Масалан, инновацион стартап лойиҳаларига 100 минг долларгача инвестиция ажратиш имконияти ёшлар учун ўз ғояларини халқаро даражада синовдан ўтказиш майдонини яратади. Бу эса нафақат молиявий қўллаб-қувватлаш, балки ёшларни кенг фикрлашга, замонавий технологияларни жорий этишга ва стратегик ёндашувни шакллантиришга ундайди.

Бундан ташқари, техникумларда стартаплар ташкил этишга рухсат берилиши таълим тизимида муҳим бурилиш бўлди. Айниқса, техникум босқичидаёқ 1 миллиард сўмгача молиявий кўмак ажратилиши ёш мутахассисларни мустақил фикрлашга, инновациялар яратишга ва амалий тажриба орттиришга рағбатлантиради.

Шунингдек, ёшлар учун халқаро тажриба ҳам муҳим аҳамиятга эга. Шу нуқтаи назардан, “Wорк анд травел” дастури орқали хорижда ишлаш имкониятининг яратилиши уларнинг нафақат касбий, балки дунёқарашини кенгайтиришга хизмат қилади. Бу эса ёшларнинг глобал меҳнат бозори талабларига мослашуви, тил билими ва маданий компетенсияларини мустаҳкамлашда муҳим омил бўлади.

Яна бир муҳим ташаббус — “Ёшлар бизнес инкубатори”нинг ҳар бир ҳудудда ташкил этилишидир. Ушбу марказлар ёшлар учун менторлук, маслаҳат, бизнес-режа ишлаб чиқиш ва бозорга чиқиш жараёнларида доимий кўмак берувчи платформага айланади. Шубҳасиз, бу эса ёшлар орасида тадбиркорлик маданиятининг шаклланишига хизмат қилади.

Бундан ташқари, ижтимоий йўналишдаги ташаббуслар ҳам алоҳида эътиборга лойиқ. Хусусан, Ёшлар ишлари агентлиги қошида “Волонтёрликни қўллаб-қувватлаш” жамғармаси ташкил этилиши бу соҳанинг тизимли ривожланишини таъминлайди. Жамғармага ҳар йили 62 миллиард сўм ажратилиши волонтёрликни узлуксиз ижтимоий ҳаракатга айлантиради. Шунингдек, энг яхши лойиҳалар учун 100 миллион сўмгача грантлар ажратилиши ёшларнинг ижтимоий ташаббусларини рағбатлантиради.

Маънавий ривожланиш нуқтаи назаридан эса китобхонлик маданиятини ривожлантиришга қаратилган ташаббуслар муҳим аҳамият касб этади. Жумладан, иқтидорли ижодкорларга ойига 20 миллион сўм миқдорида қўллаб-қувватлаш берилиши, шунингдек, фаол ўқувчиларга 10 миллион сўм мукофот ажратилиши ёшлар орасида китобхонликни кенг тарғиб этади.

Эътиборга молик яна бир лойиҳа — “Иккинчи имкон” лойиҳаси бўлиб, у жазони ўтаб чиққан ёшларни ИТ-касблар ва хорижий тилларга бепул ўқитиш орқали уларнинг жамиятга қайта интеграциясини таъминлайди. Бу ташаббус ижтимоий адолат ва тенг имкониятларни таъминлашда муҳим қадам ҳисобланади.

Шунингдек, таълим ва бандлик йўналишида ҳам муҳим янгиликлар жорий этилмоқда. Жумладан, ҳар бир туманга 500 миллион сўмгача ссуда ажратилиб, касб-ҳунар лабораториялари ташкил этилиши режалаштирилган. Бундан ташқари, хусусий сектор билан ҳамкорликда ҳар йили 20 минг ёшни замонавий касбларга ўқитиш ташаббуси илгари сурилди.

Умуман олганда, ушбу кенг қамровли ёндашув ёшларнинг иқтисодий мустақиллигини таъминлаш, уларни глобал меҳнат бозорига тайёрлаш ва энг муҳими, уларнинг ўзига бўлган ишончини мустаҳкамлашга хизмат қилади.

Хулоса қилиб айтганда, ёшлар билан ўтказилган очиқ мулоқот натижасида илгари сурилган ташаббуслар нафақат оддий режалар тўплами, балки ёшлар сиёсатида янги даврнинг бошланиши сифатида баҳоланиши мумкин. Бу ташаббуслар орқали Президент Шавкат Мирзиёев ёшлар салоҳиятига бўлган юксак ишончини яна бир бор намоён этди.

Натижада, бугун ёшлар учун имкониятлар кенгайиб бормоқда. Ҳар бир ғоя ва ташаббус қадрланаётган муҳитда улар эртанги куннинг ишончли таянчи, замонавий иқтисодиёт ва кучли фуқаролик жамиятининг асосий ҳаракатлантирувчи кучига айланмоқда.

Отабек СОБИТОВ,

Қонунчилик палатаси ҳузуридаги Ёшлар парламенти раиси